Life as a 2 hit 6

好啦，我成日將農夫叔叔這套疊埋其他劇一齊出文，為慶祝我終於睇完兩輯壽司版《仁醫》(壽醫？)，來個獨立出文讚美一吓先。

睇完個結局內心好激動呀(竟然去到激動？)，um，這部真值得大推的說。(也就是說，泡菜版真的…很…騎…呢…)

睇番第一篇文係3月16日，小的上個星期日才看畢成90分鐘的大結局，足足睇咗兩個月﹗(無記，中間追吓呢套又跟播吓那套咁，好忙呀﹗)

好了，讓我讚美一吓吧﹗

um，其實我真的不喜歡大澤農夫叔叔(是隆夫啦…被打)，不過就係佢個樣誇得嚟又滿有傻氣(或曰敦厚？)，懷著(對比江戶人)異於常人的醫術又唔囂，才會嬴得身邊人信任和愛戴，甚至願意為佢奔走吧？睇住佢由橘家、緒方大夫、仁友堂一眾大夫到醫學院的松本大夫信任和又真係好熱血和感動的說…um…雖然農夫叔叔的演出還真是很誇張…不過佢啲皺紋都有戲呀…(呀…邊看南方大夫和咲的對手戲…um，佢竟然連遙妹都感動埋…強)

其實一路我也不太喜歡中谷美紀的，但詭異的是我又睇睇埋好多佢既影視作品(甚麼被嫌棄的松子甚麼一生好像很有人氣？…而原來《愛上July 24大道》也是跟農夫叔叔合拍架喎，但我只知名未看過)，而佢也真能將野風的花魁氣派表露出嚟，現代版扮番學生妹未來(despite佢啲紋跟可比農夫叔叔的…也是有戲交既…哈哈哈)演技上都有說服力的(如果我唔理啲紋的話)。um，感情線上野風跟咲都喜歡南方大夫，但二人都沒有特別大動作去搶南方大夫，而野風知道咲跟南方大夫的感情仲祝福對方，淡淡然的但感情是強烈架喎，唔刻意，我好鐘意(是特登咁樣寫到句子斷埋尾的嗎？哈哈)。um，其實呢，我想問野風著幾廿層的花魁衫，點樣仲可以隔幾廿層衫摸到自己胸部有硬塊呢？(其實呢段好慘的，諗住佢有住好人家時又偏偏有病…但我誤焦點了…哈哈)…anyway，雖然佢唔能夠守在南方大夫身邊，但無啦啦俾佢嫁咗個法國人，又俾佢千辛萬苦生了個女(都係暗啞底為南方大夫而做，但佢都知自己係未來祖先呢吓勁喎﹗)((而無麻醉之下剖腹取嬰真係痛到阿媽都唔認得，咲不停拍打bb想佢喊出聲那一吓真係好緊張，邊睇邊諗bb真係唔喊點算呢…唉…我中晒劇組計啦…))…從細微位透啲暗暗的感情線出嚟，感情反而來得更強烈，最緊要是唔刻意，真的很喜歡。

(um，我諗我唔喜歡中谷小姐的來源…大概是因為那套悶到我暈的《和弦，愛的盡頭》，可以悶出個陰影從而唔想再翻看都算勁啦掛﹗﹗﹗﹗﹗)

um，跟住到來來我就很喜歡的遙妹。本來我覺得咲呢個角色可能係襯托南方大夫，咲既阿哥恭太郎係南方大夫第一個在江戶的病人嘛，咁順利成章佢個妹就成了第一個手術的助手，咁主打係做啲驚訝表情同問問題，突顯出江戶人跟現代人的分別咁啦，但睇睇吓，咲睇得出南方大夫掛念未來(那張相)，呢個女仔好識進退，雖然暗暗喜歡南方大夫但知佢有心上人(同因為未來跟野風一樣樣而處處相讓)而唔會有進一步行動，但在醫人方面就處處相助，甚至唔理自己武家女兒的身份，到榮夫人俾佢學醫，見佢感動到守舊派的媽媽又是一個好簡棟，始終未係明治維新年代嘛，女兒家成日圍埋班男人一定俾人講是講非，而咲又好明事理知道南方大夫始終有一日可能會返番去現代而拒絕走在一起的建議…真係知進退得讓人心酸﹗

好喜歡結局終於南方大夫都係回到現代，而古代人個處理手法係南方大夫被隱去了，大家都唔記得曾經有過咁樣一個人，但咲就隱約記得曾經有過一個咁既身影，一齊走過路，一齊睇過夕陽，又為佢整過炸豆腐(雖然結局未來問南方大夫係咪鐘意炸豆腐是有點詭異的)，最後咲寫下了封告白信給呢個佢唔記得名的OO大夫，300年後經未來的手交番到穿越回現代的南方大夫手中，讀信的時候簡棟到哭了(嗚…這個讓我想起《王世子》的結局…哈哈﹗唔係話佢抄橋既，咁古代人唔寫信可以寫咩啫﹗)，仍然是淡淡然(不過是多了少少煽情位了)，咲收養了野風的女兒，獨身終老，將娘家改造成醫院等等…無不是被南方大夫所影響吧，雖然南方大夫不存在江戶年代了，但咲心裡有佢…um，是有點悲傷，但又合情合理的吧…umum…(而恭太郎卒之執到瓶小藥樽救活了咲，未來說是「死馬當做活馬醫」救番，呼~~~~鬆了口氣呢)

仁友堂曾經做spy的佐分利大夫(桐谷健太)依然是做佢成日喺日影/視度做的傻on小子，但又有點衝動和攪吓gag咁，佢做完spy後被松本大夫放棄，南方大夫說要帶番佢去仁友堂又是一個熱血感動位(唉，我沒其他形容詞了~)，到結局時佐分利大夫說自己是庸醫，因為對住佢最想醫的病人~aka南方大夫和佢個腦瘤卻沒辦法醫得成感到一萬個無奈時，南方大夫應該很感動吧，一來是佢自己作為大夫的覺悟，二來是佐分利大夫自身和仁友堂上上下下都喺佢訓練下學到相當的西洋醫術了。另外是肥仔大夫(我成日唔記得佢叫咩…山田？)，佢跑住說自己收埋一瓶盆尼西林和第二輯尾代南方大夫頂罪那一吓又是相當感人的說…或許成班人都可能被理想化和人性美化了，不過就不要challenge了，反正一班人堆在一起為理想而戰，簡棟就係簡棟囉~

另外我好驚佢的龍馬san還是很嘈(我係咪應該挑戰吓令仔版的福山雅治版呢？)，到結末佢終歸被暗(暗嗎？)((呀，南方大夫始終都改變唔到歷史…))殺(佐藤隆太也是少見佢演啲正經角色？﹗)，做完手術後正經講野唔慣添。而恭太郎小出惠介，可能我被《我的機械人女友》影響了…唔慣佢同遙妹係兄妹唔係情人喎﹗(笑)…我想問佢同初音仲有無followup？好難得有個女仔咁明白佢不得志的處境嘛…。另，喜市didi很可愛同很會做戲，係可愛地會做戲而唔係我很會做戲地會做戲喎﹗

um，第一輯和第二輯就好似alevel econ咁，頭一部係micro，主打講南方大夫面對唔同病患而做出唔同工具/藥物，加少少人事鬥爭呀咁；第二輯就變macro，開始講幕末各藩和德川幕府你打我我打你，由小轉大，南方大夫由本來佢醫古人係影響個人命運變成係咪影響歷史，件事大咗好多，咁手術呀醫人的畫面都少咗，有既好多時都係戰爭而設的醫療站，醫啲friend就有一開始榮夫人腳氣病和尾咲的感染(咦，橘家一家三口都被南方大夫醫勻了)和野風生b，至爆炸係和宮都俾佢醫埋，真係勁喎﹗(所以泡菜版唔止要皇妹，係醫未來的王，勁過﹗)

整體來說穿越的謎、歷史改造、蒙面人(我想問，穿越江戶的南方大夫回到現代，發現現代都因應佢古代做的事而改變了，咁歷史重現被穿越的本來的南方大夫又去咗邊？火星？如果佢又去番古代，咁改造歷史咪又發生一次…咁咪在平行時空不停出現南方大夫回到過去又回到未來…咁咪有好多唔同面貌的過去未來？)之謎都解開了，跟住南方大夫和咲和未來的情緣都解構了，完滿啦(我係唔明點解個瘤係bb狀啫…唔通我掛住被簡棟而miss了？)，睇完很回味，原來是佳作，我遲看了…嗚…

另，很好聽的兩首主題曲，雖然我個人比較喜歡平井堅叔叔，不過先入為主，對第一輯的misia一首比較入腦…