Life as a 2 hit 6

第3天最好玩是搭了個幾兩個鐘的地鐵﹗我想話我成個2012年(或者2011年都係)加埋都無搭到咁多囉﹙勁囧﹗)

去了的地方：
甚麼泡菜工房-->健肝寶專門店-->甚麼化妝城-->明洞/南大門-->樂天免稅店(點解當係一個景點？)-->東大門

下午兩點幾終於都到明洞了…本來期待可以行吓《美男》劇中那條飲食購物路線，但沒有追星的同伴…呃…算啦…同行旅伴說有個甚麼migliore衣服相當不錯，行了幾轉化妝店就貢咗去…呃…怎麼全場都係圓領衫和《王世子》入面女二啲西裝縷襯短褲﹗囧﹗我無長腿呀﹗同埋香港廿幾三十度著西裝縷？焗脂減肥嘛？

anyway，買衫不成在疑似NR總店度見到有CD/雜誌店就貢了上去，奇遇是…一行三人要幫人買一隊野入面某成員的精品，但三人都唔識呢隊野喎﹗跟住問店員用勻兩文三語都溝通唔到時…竟然日文得喎﹗(終於都可以俾我扮日本人了﹗)

而呢個店員姐姐是相當helpful吓，係咁幫我地搵呢個搵那個的product(同時在店裡有兩個來自香港的少女都在掃偶像精品，佢地俾了好多意見啊﹗)，咁俾錢時…店員姐姐送了買的兩隊野的相各乙張…之後小的買了兩本雜誌(一本是有天少爺一本是上一期碩碩的)，小的只係喺擺過期期數個櫃度問姐姐有無最新一期，之後拎了本和3月號的去俾錢…姐姐竟然識問小的係咪碩碩粉，送上一張碩碩相﹗佢都好觀人於微啫﹗全程小的都在幫人搵呢樣搵那樣…反而無乜望碩碩野架喎﹗(除了不停偷影店內的碩碩相囉…哈哈…)

掃了少少街就再戰過…想過左上角個煎(？)餅好好味﹗我想問檔口個伯伯係鹹定甜的，出盡我三文四語的能力問極佢都係答我幾多錢…囧…吃了一口…甜的﹗想扯開佢些牙的時候…啲甜耶耶的餡就係咁流出來了(友伴說應該係豆蓉)…唔怪得俾隻杯我食啦…

 

跟住又翻兜migliore和uus，果然是平很多了…不過係wholesale場囉，最少都要買同款兩件或以上…囧﹗吾等人少少而taste不又盡相同…卒之得個行字…兜吓兜吓…仲兜咗一個十分阿豬媽品味的商場度添…

買過乜化妝品和衫都不是重點了，重點是呢條返酒店的十萬五千里長征路線呀﹗很癲﹗仲癲過柴灣去羅湖呀﹗(太誇了？其實商大站((笑))轉車上羅湖不怎樣麻煩啫？係地理上遠？)…我覺得勁漫長的個幾鐘原來只係27個站(我以為30個或以上囉)…又因為是星期五，勁多人趕住返出城，於是明明夜晚十點幾十一點都逼過返工時間金鐘過老尖…勁辛苦…(最衰我唔識搭巴士囉…)((又說因為睇旅遊書話每條路線的尾班車時間不一…為免無車返去要搭勁多的士…於是吾等只行到十點鬆啲就閃了…))

攪笑的事情又發生，搭到甚麼溫水(Onsu)站時，有個坐在位子上的婆婆問我野喎…跟住憑我僅有的泡文知識…我聽到「odia」三粒音…我估佢問我去到邊個站掛？答了佢兩次「Onsu」(好在個站得兩粒音又無終聲…我估我無讀錯掛？)之後佢徐徐企起身落車去…呃…我諗我無估錯掛？﹗嘩哈哈，又說我個樣太友善了﹗去到邊都有人搵我幫忙既？﹗嘩卡卡卡卡…

又說，因為俾導遊老點從車站行返酒店頗遠，於是我地搪到去1號仁川線無轉車轉的士回去(搭了兩種交通工具感受生活耶﹗)((跟的士司機也用了我僅有的幾句泡菜…就係呢度和唔該﹗哈哈哈))…搭到返酒店時先發現車站跟酒店只是幾步路囉﹗我想殺人呀﹗

又又說，上面話本來想去某站但最終搭了去另一個站呀呵？係啦，吾等八達通mode太強了，忘了單程飛是點對點咁買，又說泡菜啲車飛係basic再on top唔知幾多公里咁加錢…於是出唔同的站車資就唔一樣…於是吾等出閘時…係出唔到囉…跟住咁啱有個職員大叔站在一旁開閘俾我地走…都唔check吓我地乜事又唔理我地買咗乜車飛…咁…我俾最少車資而搭最長線咪勁so？﹗(呃…但time cost好高囉…)…

呃呃呃呃呃…回到酒店後勁開心在欣賞明洞的戰利品…竟然又是一個小冰子不想睡，又喺度睇電視﹗

**************************************************************
泡菜之旅全集：
失驚無神泡菜國之旅~7(完)~第4天 & 蝸牛面膜
失驚無神泡菜國之旅~5~第2天
失驚無神泡菜國之旅~4~睇電視(廣告)
失驚無神泡菜國之旅~3~第1天
失驚無神泡菜國之旅~2~一人闖弘大
失驚無神泡菜國之旅~1~橡筋鍚